Jes Ja

Kálmán Kalocsay

Marxist’ mi estas, jes ja, kaj fiera
Pri tio! eĉ se moki vi arogas,
Ke tia “katekismo” min allogas.
Ja kion fari, se ĝi estas vera!

Mistero, rev’, ekzalto, bel’ etera
La paradizon super nubojn lokas,
Kaj la piedoj, dum l’anim’ mensogas,
Jen vadas en la sanga marĉo tera.

Se trafis nin tertremo kaj inundo,
Kaj novaj nin minacas, ĉu sur grundo
Ŝancela serĉi floron esoteran?

Ni luktu kontraŭ krimoj kaj malsaĝoj,
Kaj se ni faris jam la ordon teran,
Nu, venu beloj, revoj kaj miraĝoj!

FONTO: Kalocsay, Kálmán. “Jes Ja” (1947), Internacia Kulturo, 37: 13-14, p. 19; Dissemitaj floroj: originalaj poemoj kaj tradukoj ekstervolumaj de Kálmán Kalocsay, enbukedigis Ada Csiszár (Budapest, 2005), p. 38. (Post poemciklo “Tra la Ŝtormo”?)

“Marxist’ mi estas, jes ja ...” — skribis Kalocsay en 1947, sed li kaj la klare vidantaj homoj baldaŭ seniluziiĝis spertante la misfunkciadon de la marxismo, la stalinan subpremon, malhumanecon. Pli kaj pli influis la personkulto, akriĝis la malvarma milito, fortiĝis la diktaturo.

— Ada Csiszár, Dissemitaj floroj, p. 10

“Laborist-portreto” de Lajos Kassák, tradukis Kálmán Kalocsay

Arĝenta Duopo: Jubilea Libro pri Julio Baghy — Kolomano Kalocsay

Ora Duopo: Jubilea Libro pri Julio Baghy kaj Kolomano Kalocsay
(enhavtablelo kun retligoj)

La Kremo de Kalocsay
(enhavtabelo kun retligoj)

Hungara Antologio (1933), redaktis Kálmán Kalocsay;
kunlaboris Julio Baghy, Károly Bodó, László Halka, Ferenc Szilágyi, Ludwig Totsche

Hungara Antologio, redaktis Vilmos Benczik (1983)

Kálmán Kalocsay: Retgvidilo / Web Guide

Esperanto & Laborista Movado / Esperanto & the Labor Movement

Esperanto & Interlinguistics Study Guide / Esperanto-Gvidilo

Alireteje/ Offsite:

Kálmán Kalocsay @ Ĝirafo

Nyelvi egyenlöség (poemoj de Kálmán Kalocsay)