Heinrich Heine

Lazaro

(1853-1854)

1

Lasu piajn hipotezojn,
lasu sanktajn parabolojn,
provu la demandojn damnajn
solvi sen preterparoloj.

Kial trenas sin sub kruco
sange la justul’ mizera,
dum en alta sel’ feliĉe
trotas malicul’ fiera?

Kies kulpo? Ĉu Sinjoro
mem ne ĉiopovas plene,
aŭ li mem ĉi fiojn faras?
Ha, ja estus abomene!

Jen demandas ni persiste,
ĝis per plena man’ da polvo
oni ŝtopas nian faŭkon.
Sed, ĉu tio estas solvo?

trad. Kálmán Kalocsay