Septeto — Limerikoj — Afore — Tradukoj

Pensado terure la pensojn lacigas.
Denun mi limigan sistemon praktikas:
Mi pensas ĉi-jare de l' dato unua
nur de la tagmezo ĝis horo dekdua.

Se l' fonto de ĉia malpaco kaj skismo
troviĝas en sukoj de l' hom-organismo,
ĉu abstinenculoj estas kontentaj,
ĉar akvo ni estas ĝis-naŭ-dek-procentaj?

Nuntempe krudeco kaj krimo ekscesas.
Nur unurilate moralo progresas:
Mi legas en krim-statistiko de l' ŝtato,
ke grave malkreskis — ĉevalo-ŝtelado.

Ne kredu, se iu cinike pretendas:
"Nenio malhoma en Mondo min fremdas!"
Ĉar ofte sub tia sentema ekspono
ja povas frapeti korego de ŝtono.

Usona blankulo delklaris sen honto:
Malŝatas mi du malĝustaĵojn de l' mondo:
Diskriminacion pro rasa integro
kaj devon dividi bufedon kun negro.

Se homo subiĝas al rokfirma kredo,
ke ĉiuj problemoj de nia planedo
solveblas per cerb-mobilizo plej drasta,
pruvigas ĉe li horizonto malvasta.

Tineo ekflaras pro forta inklino
jam kelkkilometre ekziston de ino.
Ĉu eble funkcias in-sektaj organoj
simile surkorpe de gekongresanoj?

Tri limerikoj

Poeto en urbo Palermo
plenigis la plumon per spermo.
----Nun nokte kaj tage
----potencas image
la porno-poemo-cisterno.

Sinjoro doktoro O'Mungo
forpasis pro ruĝa muŝfungo.
----La kara sinjoro
----sur sia motoro
flankvidis dum unu sekundo.

Mondumaj sinjoroj de l' Mondo
fervoras en ĉiu gerondo,
----ke fajras la fino
----ĉe ĉiu animo —
kaj nefumantin' estas honto.

Afore

Nur unu eraron li havas:
konstante li pravas!

Li mortis pro preseraro
sub bildo en fung-kalendaro.

Mi samopinie predikas,
ke ĝuste malsamaj ideoj fortigas.

... kaj fine pri tradukoj:

Tradukoj kaj virinoj
konfirmas jam sen finoj:
malofte la fidelaj
samtempe estas belaj.

FONTO: Norda Prismo, n-ro 3-4/1968.