Metafiziko

Timothy B. Carr

Se nuntempanoj legus la broŝurojn
pri rezidejoj for en la Pretero,
ĉu hastus mendi harpojn aŭ sulfurojn
tiuj infanoj grasaj de l’prospero?

Sendube ili spitus la terurojn,
se estus magazenoj en l’Infero;
kaj tra l’Ĉielo stampus siajn spurojn
per dometaroj taŭgaj por somero.

Bonŝancaj Danto kaj Miltono! Fratoj,
por vi ĝi estis nura fantazio;
mi, tamen, LOĜAS en pandemonio,

la paradizo de la teknokratoj.
Ne miru je l’amplekso de mensogoj!
Jam falsis universon teologoj!

GLOSOJ

MILTONO — fama angla poeto (1608-1671), aŭtoro de la “Perdita Paradizo”.

PANDEMONIO — loĝejo de ĉiuj diabloj; (f) loko de senbrida furiozo kaj tumulto.

TEKNOKRATO — iu el la teknikaj spertuloj, al kiu oni komisias, oficiale aŭ ne, la solvon de ekonomikaj problemoj, kaj kiuj ofte ignoras la humanajn flankojn de la problemoj. P.I.V. 1987.



FONTO: Carr, Timothy Brian. “Metafiziko,” La Kancerkliniko, n-ro 58, aprilo-junio 1991, p. 28.


Filozofo, poemo de L. N. M. Newell

Esperanto & Interlinguistics Study Guide / Esperanto-Gvidilo


Home Page | Site Map | What's New | Coming Attractions | Book News
Bibliography | Mini-Bibliographies | Study Guides | Special Sections
My Writings | Other Authors' Texts | Philosophical Quotations
Blogs | Images & Sounds | External Links

CONTACT Ralph Dumain

Uploaded 30 July 2014

Site ©1999-2014 Ralph Dumain