William Auld

Unu el ni

Sidas sub lampo.
Legas librojn.
“Edukiĝas”.
Fariĝas ĉiutage pli ĉifona.
Tri tagojn lasas ŝimi
sian barbon.
Dek jarojn lasas ĝibi
siajn ŝultrojn.
L’ edzinon kokri lin senzorge lasas,
Kaj ĉiutage pli senrisortiĝas
Ĝis iam miro estas jam maroto,
Kaj, kvazaŭ nuda mar-molusk’ en konko,
Li timas trudi kapon en eksteron.
Kaj tro malfrue
Konstatas, ke nenion li plenumis,
Repensas al iama knab’ sincera
Kies intenco arda ne sufiĉis.
Kaj
Sidas sub lampo.
Legas librojn.
Kadukiĝas.

1952

FONTO: Auld, William. "Unu el Ni" (el Unufingraj Melodioj), en En Barko Senpilota: Plena Originala Poemaro, red. Aldo de’ Giorgi (Pizo: Edistudio, 1987), p. 327.

William Auld Memorial Page / En Memoro

Esperanto & Interlinguistics Study Guide / Retgvidilo pri Esperanto & Interlingvistiko

CONTACT Ralph Dumain

Uploaded 6 July 2012